Eva María Fernández ye vicepresidenta de la Sociedá Cultural Xixonesa y vecina d’El Natahoyo
Escribo como una vecina d’El Natahoyo avergonzada colo que ta pasando nel barriu. Y ye que cada vez reconozo menos la ciudá a la que vine vivir nos años 90, una ciudá con un sentíu fuerte d’identidá y de comunidá, acoyedora y solidaria.
L’anunciu de la rehabilitación del Albergue Covadonga y del agospiu provisional de los sos residentes n’El Natahoyo, entamó una campaña incomprensible de refugu, na que s’acolumbra una sociedá que camina p’hacia la desintegración, l’individualismu fieru y la indecencia. Cuando entá yeremos una ciudá obrera, seique porque’l desemplegu y la probitú taben mui cerca, naide nun se plantegaba refugar a quien cayera en desgracia. Dalgunos por sentimientos relixosos, otros por convicción política, pero pocos s’atrevíen a amosar esa falta d’empatía.
¿De qué tien mieu esa xente qu’acosa a representantes públicos escoyíos democráticamente con una agresividá incomprensible? ¿De que les sos viviendes baxen de preciu? ¿De que los sos fíos y fíes vean una realidá social que nunca nun tendríamos d’escaecer?
Nun paecen incómodos porque la ciudá se tresforme nun llugar onde los mozos nun pueden vivir porque ye imposible pagar un arriendu. Tampoco pol espardimientu d’agospios turísticos y los problemes de convivencia qu’eso puede orixinar. Sólo-yos molesta la probitú, cuando fai poco más de diez años munchos y munches de nós pudimos ser arrollaos pola crisis financiera y atopanos na mesma situación de quien güei viven nel Albergue.
Namás pido al Ayuntamientu de Xixón que nun retróceda y a los mios vecinos y vecines d’El Natahoyo, que nun se dexen llevar por campañes del mieu basaes en falcatrúes y mentires. La sociedá xixonesa tien la obligación de confrontar discursos d’odiu que pretenden la intimidación verbal y física. Como bien dicía Edmund Burke, pa que’l mal trunfe namás ye necesario que les muyeres y los homes bonos nun faigan nada.