La película que proxectamos esti mes pertenez a un de los realizadores más reconocíos, galardonaos y quiciabes influyentes del cine mundial. Abbas Kiarostami, director iranín fináu en 2016, foi almiráu por colegues tan reconocíos como Martin Scorsese o Akira Kurosawa, quien dixo superar la so murnia a la muerte del Satyajit Ray cuando vio un filme de Kiarostami, reconociendo nél una maestría y talentu únicu.

“El sabor de les cereces” recibió tou tipu de premios pero lo más importante ye la so llección de poesía y reflexón vital, con un estilu nes antípodes del gustu polo barroco y la complexidá vacía que trunfa hai yá décades. Menos ye más y Kiarostami encárgase de demostralo.

Dirección: Abbas Kiarostami
Intérpretes: Homayoun Ershadi, Abdolrahman Bagueri, SAfar Ali Moradi.
Duración: 98 min.
Nacionalidá: Irán

SINOPSIS

Un home percuerre Teherán en busca de daquién que lu ayude nel so proyectu de suicidiu. Nel camín vamos conociendo a dellos personaxes que respuenden a les pretensiones del protagonista de distintes formes, negándose a ayudar o intentando convencelu del valor de la esistencia.

Nota: La proyección va presentala Nacho Muñiz.

(*)Les proyecciones van empezar a les 19:00 h y van proyectase en versión orixinal con subtítulos en castellanu.