Presenta Genma Llabres Directiva de la Sociedá Cultural Xixonesa.

Basada en fechos reales, Badaq ye una fábula moral esquisitamente narrada na qu’un animal toma la palabra para denunciar la codicia de los humanos, el fanatismu relixosu y la destrucción de la naturaleza per parte del home.

1583. Una badaq -o rinoceronte indonesiu- pace tranquilamente na isla de Pawu. Cuando llega un galeón castellanu, l’animal ye testigu de les relaciones ente colonizadores ya indíxenes y conviértese en moneda de cambéu ente ellos. Llévenlu hasta Madrid, onde la so vida va correr peligru si nun consigue escapar d’un destín ensin sentíu. Al so alredor, téxese una trama d’intereses y corrupteles ente políticos ensin escupulicios, llibertinos cobiciosos y desertores imperiales xustu cuando’l mayor imperiu de la cristiandá ta entrando en decadencia. Na so fascinante nueva novela, Carlos Bardem construyó con maña y precisión un minuciosu frescu históricu que reflexa’l gobiernu depredador de los imperios español y portugués, la peligrosidá de la Inquisición y los graves abusos de la colonización. Carlos Bardem ye llicenciáu en Filosofía y Lletres, caña Xeografía y Hestoria, especialidá Historia Moderna y Contemporanea pola Universidá Autónoma de Madrid. Tamién ye diplomáu en Relaciones Internacionales pola Real Sociedá d’Estudios Internacionales (adscrita al CSIC). Provien d’una de les más antigües sagues d’actrices y actores del país, oficiu al qu’acabó averándose con pasión y aplicación ponderatible en percorriendo’l mundu y dedicase a bien delles ocupaciones. El so otru oficiu ye’l d’escritor. Combinó dambos mundos como coguionista del llargumetraxe “Bestiario” (2001), peli underground que naide vio, y d’Alacrán Namoráu” (2011), adaptación al cine de la so novela del mesmu títulu. Foi nomáu al meyor guión afechu na Medaya del CEC y los Premios Goya del 2014. En 1997 publica “Durango Perdido” (Ediciones B), llibru de viaxes y diariu de rodaxe de “Perdita Durango”. Yá en 1999 publicó la so primer novela, “Muertes Ejemplares” (Ediciones Destino), que foi Mención especial del Xuráu del Premiu Nadal d’esi añu. En 2002 publica otra novela, “Buziana o el Peso del Alma” (Ediciones Destino) y Premiu Destino Guión. Depués redacta les memories de la so madre, publicaes como “La Bardem” en 2005 (Plaza y Janés). Yá en 2010 publica otra novela, “Alacrán Namoráu” (Plaza y Janés), finalista del Premiu Hammett de novela negra y depués llevada al cine.