Presenta Francisco Erice, Catedráticu d’Hestoria Contemporánea de la Universidá d’Uviéu.

Xueves 19 de xunu – 19:00 hores
Local de la Sociedá Cultural Xixonesa
2ª planta – Escuela de Comerciu

Ganancia social, beneficiu priváu ufierta una revisión crítica del pensamientu de Karl Marx, centrada na teoría del valor y lo que l’autor denomina catastrofismu proféticu: la predicción fallida d’un colapsu inminente del capitalismu. Carlos Tuya pon en cuestión la relevancia de la teoría clásica del valor-trabayu, que considera inaplicable na economía del conocimientu actual pola naturaleza intanxible de los activos que la carautericen.

El colapsu de la URSS y la desaparición del bloque socialista supón, pa Carlos Tuya, la refutación de dellos postulados del materialismu históricu, anque ello nun anula l’ideal d’una sociedá igualitaria. A pesar de les llendes del pensamientu de Marx, l’autor reconoz la so valiosa contribución al analís de les sociedaes humanes, especialmente na rellación dialéutica ente les fuercies productives (fp) y les rellaciones de producción (rp). Una contribución que, por desgracia, Marx nun llegó a desenvolver dafechu.

Nel so analís, Carlos Tuya apóyase nes Ciencies de la Complexidá, aplicando los principios de los sistemes complexos non lineales, abiertos, dinámicos y adaptativos pa entender los procesos socioeconómicos y proponer l’aición política pa la so tresformación.

Tuya propón un modelu teóricu que inclúi:

• L’Ampliación de la Democracia, cola integración institucionalizada de les distintes formes de democracia participativa, deliberativa y direuta;

• La Democracia Económica, que lleve los derechos de ciudadanía a les empreses, cola conquista de la cogestión executiva;

• El fortalecimientu y l’estensión del Estáu Social y Democráticu de Derechu, tanto nos aspectos asistenciales (con especial atención a la vivienda como derechu constitucional), como na racionalidá de l’actividá productiva, la regulación de los mercados y la planificación orientativa de la economía;

• Finalmente, l’impulsu d’un Proyeutu Federalista que resuelva los problemes del diseñu territorial n’España y dote d’auténtica autonomía estratéxica a la Xunión Europea.

Estos seríen los aspeutos esenciales d’un procesu gradual de tresformación del capitalismu y, al empar, la respuesta a les fuertes presiones adaptatives que ta esperimentando’l capitalismu na Era Dixital y el Cambéu Climáticu, que suponen un riesgu esistencial pa la humanidá.