Iris Díaz ye Maestra de Primaria y escritora
A la base del cansanciu y el cabréu de la comunidá docente asturiana, que mañana 27 de mayu vamos secundar masivamente la primer xornada de fuelga educativa, hai, pamidea, dos decisiones abusives per parte de la alministración: la primera ye confundir el llabor educativu col d’atención o cuidáu, actuando en consecuencia dende hay más de diez años; y la segunda la falta de inversión nes etapes educatives que tendríen de ser cimientu del propiu sistema.
Desarrollo, dende la perspectiva de la maestra “rasa” y cola brevedá que nos vien marcada pola inminente convocatoria, caún d’estos dos puntos.
Si buscamos nun bancu d’imaxen el recursu d’un docente, inmediatamente van surdir semeyes que muestren a muyeres y homes sonrientes, casi siempre al frente d’una clase maxistral, dirixida a un grupu reducíu de rapacinos coles manes entusiastamente llevantaes.
La realidá de la nuestra profesión, nos más de los casos, nun respuende al canon. Tenemos clases con neños y neñes maraviyoses (toos lo son), con necesidaes cada vuelta más diverses y complexes, dacuando actitúes disruptives que precisen d’un sobreesfuerzu en xestión d’aula y munches veces, demasiaes, con un total (lo que llamamos “ratio”) que l’alministración permite y supera mui muncho lo razonable pa l’atención individualizada que merez caún d’ellos.
Tando dando clase, polo tanto, no que llamamos “docencia directa”, ye verdaderamente complicao facer más nada que xugar a les malabares pa mantener l’atención y pasiase de mesa en mesa pa dedica-y a lo menos unos segundos a caúna de les personines que tenemos al nuestru cargu.
Y asina, precisamente, ye ónde nos quieren: con horarios sobrecargaos hasta l’estremu con docencia directa, horarios que tien d’aprobar una alministración que nun permite llenar los “güecos” con llabores fundamentales pal llabor educativu como la coordinación ente docentes del mesmu grupu o nivel, l’atención a families y la función tutorial, la preparación de clases, les reuniones colos equipos (menguaos) d’orientación de los centros, los programes d’innovación de los que tanto cacareen… ¿sigo?
Un docente d’Infantil y Primaria pue plantegar, de manera inocente, preparar una sesión nos llaboratorios en desusu de los centros, col material que compra del so bolsillu, y vese obligáu a cancelar selmana tres selmana por horarios “petaos” por una docencia directa volcada hacia los “imprevistos” como la falta d’un compañeru que nun se cubre convenientemente o l’apaición de problemes de convivencia que requieren d’una atención inmediata. ¿Ónde queda, señores de la Conseyería, relegao equí lo educativo? Tal paez, que poco-yos importa, mientres l’alumnáu tea atendíu.
Les persones que llevamos años como trabayadores d’esti sistema, sabémonos tuerquines d’una maquinaria atencional, que non educativa, a la que tolos cursos se-y aprieta una nueva vuelta. L’aumentu unillateral de la xornada nos meses de xunu y setiembre (trenta hores más, cómo non, de docencia directa), nun nos cabrea por permanecer pola hora más nunes escueles nes que yá tábemos nesi horariu, nin pol reconocimientu d’una demanda histórica (de conciliación) de les families, que puede paecenos xusta y pertinente. Ye la gota que colma’l vasu porque demuestra, y les últimes declaraciones de Lydia Espina van, directa y descaradamente nesa llinia; que nun nos quieren como los profesionales educativos que somos, sinón como los cuidadores a costu 0 nos que nos quieren convertir.
Si’l gobiernu asturianu quier facer grandes anuncies, que resuenen nos medios de comunicación y permiten garrar la bandera de pioneros, como la gratuidá del primer añu d’Universidá o la creación de la rede pública d’escueles de 0 a 3; que lo faiga, por supuestu, pero ensin desatender pa les etapes que son los pegoyos d’un sistema educativu sanu y de calidá. ¡Yá valió!, ¡yá tuvo bien!
Les maestres y maestros, de la mano d’unes families menos manipulables de lo que pensaben, y col apoyu total d’unos equipos directivos fartucos de ser la primer llinia de fueu d’un claustru tensionáu (¿estráñanos que n’Asturies nun se cubran nin el 50% de los puestos de dirección?) y la solidaridá de los compañeros y compañeres d’otres etapes; secundaremos mañana masivamente la primer xornada d’una fuelga convocada poles organizaciones sindicales (que presto que quitaren la careta les asociaciones de “fai les fotocopies torcíes que ye lo que-yos manca”).
Nun fui breve finalmente y quedaron coses por decir. Esto ye una cosa seria. Vémonos nes cais.