La entrega del galardón, obra del conocíu artista Jesús Castañón, va tener llugar el vienres 12 d’avientu a partir de les 19:00h nel local de la Sociedá Cultural Xixonesa allugáu na Escuela Comercio
El xuráu del XXXII Premiu Juan Ángel Rubio Ballesteros, compuestu por Rafael Velasco Rodríguez, Presidente de FAMYR (Federación Asturiana Memoria y República), Rafael Gutiérrez Testón, Presidente de l’Asociación de Llibreríes d’Asturies y propietariu de La Buena Letra, Noelia Ordieres Buarfa, exconceyala d’IU nel Ayuntamientu de Xixón, Isabel Delgado Martínez, exdirectiva y socia de la Sociedá Cultural Xixonesa, Javier Arjona, galardonáu na edición anterior y Juan Ángel Rubio Serraller, como representantede la familia Rubio y presidiu por Pedro Roldán García, presidente de la Sociedá Cultural Xixonesa, decidió otorgar el galardón a Manuel García Fonseca pola so llarga trayectoria en defensa de los valores de la democracia, la tolerancia y especialmente’l so compromisu en defensa de la paz y la solidaridá internacionalista.
El Polesu, como ye conocíu popularmente, axunta una llarga trayectoria de compromisu políticu y social dende’l so papel na consolidación de la Universidá Popular na nuestra ciudá, pasando pela so etapa nel Congreso de los Diputaos en representación d’Asturies nes candidatures d’IU y del PCA, y la so participación activa en defensa de la paz y la solidaridá, especialmente nel casu del brutal conflictu en Palestina énte’l xenocidiu perpetráu pol estáu d’Israel, como figura indisolublemente venceyada’l Comité de Solidaridá cola Causa Árabe (CSCA).