Esti 25 de mayu, por primer vez dende la formación de l’actual autonomía asturiana, el gobiernu del Principáu apuesta por da-y visibilidá al aniversariu d’una recatafila d’acontecimientos que suponen la entrada pela puerta grande d’Asturies na dómina contemporánea. Depués de cuatro décades apostando por una fiesta relixosa (porque lo que se celebra’l 8 setiembre ye’l cumpleaños de la Virxe de Cuadonga, non la fecha desconocida d’una batalla) paez que l’actual gobiernu asturianu redescubrió esta fecha tan importante como escaecida.

Asturies, 25 de mayo

¿Qué pasó’l 25 de mayu de 1808? Bono ye repasar la cadena d’acontecimientos: Un 9 de mayu de 1808 llegaben a Uviéu les primeres noticies de les matances del 2 de mayu en Madrid, onde les tropes napoleóniques reprimieren xabazmente la sublevación del pueblu. Esi mesmu día, col envís de toprgar la publicación de les disposiciones de l’autoridá francesa en Madrid, entama un motín popular n’Uviéu encabezáu por muyeres y estudiantes que lleva a la Xunta Xeneral, que taba en plenu periodu de sesiones, a celebrar un conceyu ampliáu a otros sectores sociales, como’l cabildu catedraliciu, la Universidá y los gremios artesanos, que decidió nun reconocer a otru rei qu’a Fernando VII y entamar los preparativos bélicos. El 13 de mayu la mayoría de los diputaos, que tomaren la decisión de rebelase baxo presión popular, reculaben y revocaben los alcuerdos. Una minoría de diputados, encabezada pol que taba acabante de ser elexíu Procurador Xeneral, Álvaro Flórez Estrada, entamaba la conspiración, que se facía rialidá na nueche del 24 al 25 de mayu cuando los rebalbos, apoyaos polos militares y obreros de la fábrica d’armes, tomaben la Rial Audiencia, representante del gobiernu central, y obligaben al so presidente a convocar una sesión estraordinaria de la Xunta, convocando namás a los quince diputaos partidarios de la guerra. A un tiempu, cásique 3.000 campesinos armaos llegaos de los conceyos vecinos tomaben la capital asturiana. La madrugada del 25 de mayu la Xunta Xeneral proclamábase soberana, declarába-y la guerra a Francia, ponía embaxadores nel Reinu Uníu pa solicitar ayuda militar y entamaba la formación del Exércitu Defensivu Asturianu. De pasu, inventaben l’actual bandera asturiana. Yá nun había posible marcha atrás. Asturies taba en guerra ella sola con Francia.

Nun fai falta desplicar cómo sería la interpretación d’estos acontecimientos, y la sonadía que tendrín, si lleguen a dase n’otres comunidaes. Non solo pola casta política de les mesmes, sinón pola propia, tan dada a reconocer fechos diferenciales de los demás pero negar los propios. Los acontecimientos de mayu de 1808 supunxeron una auténtica revolución, non solo porque asina lo dixeren los sos protagonistes sinón poles consecuencies polítiques de los mesmos: el Vieyu Réxime saltaba pelos aires, paradóxicamente de la mano d’una institución del mesmu, la Xunta Xeneral, qu’intentaba encontalu. El protagonismu popular nos acontecimientos ye evidente: son dos muyeres les qu’entamen la griesca, y d’ehí movilícense toles clases populares de la capital asturiana. La Xunta Xeneral, consciente del so calter oligárquicu y por ello poco representativu, convoca un conceyu abiertu con otros sectores sociales, como los gremios artesanos, la Universidá d’Uviéu o’l cabildu catedraliciu. Cuando la Xunta recula a los pocos díis y los conspiradores de la nueche del 24 son a radicalizar el procesu fáenlo cola toma de la ciudá por campesinos armaos y obreros de la Fábrica d’Armes. Cuando se proclama soberana, hai un debate ente los diputaos: dellos dicen que la soberanía ye del rei Fernando VII, pero como nun pue exercela al tar presu de los franceses ésta vuelve al pueblu; otros dicen que non, que la soberanía ye siempre del pueblu, anque-y la ceda al monarca. En tou casu, toos dos sectores coinciden en que la Xunta, como intermediaria ente’l rei y Asturies, n’ausencia del primeru, declare la soberanía. ¿De quién? D’Asturies, non d’España. Por eso formen un Exércitu Defensivu Asturianu, non d’España. Por eso inventen una bandera d’Asturies, non d’España. Por eso’l vizconde de Matarrosa, José María Queipo de Llano, preséntase en Londres como representante d’Asturies, non d’España. ¿Quier esto dicir que los revolucionarios de 1808 yeren daqué mínimamente paecío a unos independentistes como los que meses depués apaecerín formando xuntes asemeyaes nos virreinatos americanos? Non, pa nada. Namás asumen que’l so país ye Asturies, qu’esi país (sí, país, que yera como lu llamaben, país o provincia, y non rexón que ye un términu mui posterior nel sentíu que-y damos agora) forma parte de la corona española y qu’ellos representen al pueblu asturianu, non al conxuntu de la monarquía.

Los acontecimientos de mayu de 1808 son claramente un exemplu d’autodeterminación centrípeta. A Asturies quixeron impone-y un monarca nuevu y el pueblu rebelóse escontra ello, declaróse soberanu pa siguir siendo vasallu de Fernando VII. Que Giuseppe Bonaparte yera meyor monarca que’l Borbón ye evidente. Que la so condición venía dada únicamente pola fuercia de les bayonetes franceses tamién. Anque hai quien piensa que la gran traxedia de la España decimonónica foi que los franceses nun ganaren la Guerra Peninsular, o Guerra de la Independencia como la llama la historiografía española, pensando qu’una victoria napoleónica diba afitar una revolución burguesa basada nos principios de la revolución de 1789, eso nun dexa de ser un exerciciu de política-ficción: l’imperiu bonapartista tenía’l componente burgués de los vencedores de la revolución, pero los sos principios republicanos y democráticos taben enterraos de magar la reacción termidoriana hachuquinara a los cabezaleros xacobinos. Los bonaparte venín a echar a los borbones, non a la oligarquía. El mesmu Napoleón que restaurara la esclavitú nes Antilles franceses nun diba quitala nes españoles. El mesmu Bonaparte que dixera que “con cada cura aforro un cientu de policíes” nun diba poner l’estáu laicu al sur de los Pirineos. La mal llamada Constitución de Bayona yera una carta otorgada que nun llendaba’l poder absolutu de Xosé I. Lo que quedaba yera un estáu vasallu, autoritariu, represivu, centralista y confesional. ¿Tan distinto yera eso de lo que representaben los borbones?

Por too ello’l 25 de mayu ye una fecha digna de recordar, y merez ser esi Día d’Asturies que la ceguera de los padres de l’autonomía asturiana de 1981 nun dexó facer. Día d’Asturies, sí. Nun ta de más recordalo cuando hai sectores que paecen querer facer del 25 de mayu un Día d’Asturies… ensin Asturies, más por hostilidá al simbolismu del 8 setiembre que por reconocer la enorme potencialidá democrática, federalista y asturianista de la revolución de mayu. Nun escaezamos que la soberanía popular que se proclamó yera la del pueblu asturianu. Nun escaezamos tampoco que la bandera que surde de la revolución de mayu llevaba la Cruz de la Victoria, y que los llamaos de la Xunta a entamar una nueva Cuadonga son constantes. Con toles sos contradicciones, con toles sos incoherencies, reivindiquemos la Historia que foi, non la que mos prestara que fuera. Valdrános pa conocenos meyor, y servirá de blimes pa facer el cestu d’un futuru nel qu’entre’l pueblu asturianu enteru.

Pin It on Pinterest

Share This
X