Pedro Roldán ye’l presidente de la Cultural Xixonesa
“YERA’L TIEMPU MEYOR, YERA’L TIEMPU PIOR…”
Esta frase y l’empiezu d’una de les meyores obres de Charles Dickens. Ye sorprendente que’l niciu d’una novela escrita hai más de 150 años pueda sonar tan actual y contemporánea. Güei pesie a munches contradicciones y pruyimientos incumplíos podemos dicir que vivimos el tiempu meyor. Non porque sea perfectu sinon porque llogramos como sociedá al traviés d’un esfuerzu colectivu de décades construyir un mundu con dellos de los mayores avances de la historia, una sociedá en paz y llibertá, onde los niveles d’igualdá ente homes y muyeres algamaron cotes incompletes pero al tiempu nunca vistes. Una sociedá onde los derechos llaborales, sociales y la conciliación personal y familiar rexistraron niveles nunca conocidos nun país que partía d’una dictadura sinónimu de probitú, miseria y desigualdá.
Ye’l tiempu meyor porque pesie a las amenaces medioambientales llogrose un nivel de conciencia en pro de un desarrollu sostenible como en décades nun se conociera. Por toos esos motivos y otros munchos y pesie, insisto, a los importantes retos que entá queden por afrontar podemos dicir mirando p’atrás que vivimos el tiempu meyor.
Sicasí y como bien narraba Dickens vivimos tamién el tiempu pior, tiempu nel que s’acolumbren escuros y enllenos de ñubes prietes onde dacuando con troles y verdaes a medies tamos instalándonos nuna sociedá altamente polarizada onde una violencia larvada acecha los espacios democráticos. Onde l’odiu y l’egoísmu abulten cada vez más aposentaos nel sen de la nuestra sociedá. Onde la desigualdá antroxa de falsa llibertá.
Güei queremos reivindicar dos cuestiones que nos paecen vitales a la hora d’afrontar dómines complexes y convulses como la que estamos viviendo. En primer llugar la defensa de les grandes idees, la defensa de los grandes principios. Defender les grandes idees, los grandes principios nuna dómina dominada pol populismu reaccionariu, la simplificación de los discursos y la banalización de la política ye verdá que abulta difícil y enguedeyao, una carga pesada que puede ser un pilancu nel camín.
Pero nun nos equivoquemos, son les grandes idees les que nos permitieron travesar los grandes desiertos de les dómines onde too paez perdío, onde ye difícil alcontrar un requexu pa la esperanza. Defender les idees, les ideoloxíes, los principios en dómines onde lo llíquido paez imponese y el relatu apropióse de la práctica política ye anguaño, non ya una necesidá, sinon un imperativu. Namás las grandes idees nos van permitir trevesar esos eriales p’algamar les grandes alamees nos que l’home y la muyer, llibres, van poder construyir una sociedá meyor.
Pero tamién reivindicar la militancia, el compromisu, el papel de toos aquellos homes y muyeres qu’un día dieron un pasu alantre pa dende los piores tiempos ser a construyir el tiempu meyor. Güei cuando muchos de vosotros táis equí depués d’años de militancia y compromisu ye’l momentu de davos non solo les gracies pol vuestru papel, sinon tamién pedivos un esfuerzu postreru pa tornar la vuelta del tiempu pior. Como dicía aquel del que nun quiero alcordame del nome, ¡el que pueda facer que faiga!
Fai falta afitar los espacios de la sociedá civil que son los espacios de la sociedá democrática. Poro güei tambén queremos felicitar a dos socios qu’esti año cumplieron mediu sieglu de fidelidá cola nuestra entidá. Creo que ye’l momentu afechiscu pa renovar el nuestru compromisu non cola Cultural Xixonesa namás, sinón cola nuestra ciudá.
Güei Francisco Prado Alberdi y Vicente Bernaldo de Quirós representen esi compromisu de los que nunca arrenunciaron a la defensa de la llibertá y la democracia.