El próximu sábadu 27 de xunu, a les 12:00 hores, va tener llugar l’actu de descubrimientu d’una placa conmemorativa dedicada a Ígor Medio nel espaciu que, en feches próximes, va pasar a denomase de manera definitiva cai Ígor Medio.
Con esti homenaxe, la ciudá recuerda la figura d’unu de los creadores más destacaos de la cultura asturiana contemporánea, coincidiendo col ventenu aniversariu del so fallecimientu nun tráxicu accidente de tráficu.
Natural del barriu xixonés del Natahoyo, Ígor Medio desarrolló una intensa trayectoria artística que dexó una fonda buelga tanto nel ámbitu musical como nel gráficu. Foi cofundador del emblemáticu grupu de música asturiana Felpeyu, una formación clave na renovación y difusión de la música tradicional asturiana. Paralelamente, destacó como dibuxante y artista gráficu, siendo autor d’obres tan populares y reconocíes como la célebre tira cómica La familia Castañón, convertida yá nun referente pa delles xeneraciones de llectores.
La instalación d’esta placa constitúi un primer pasu dientro del reconocimientu públicu que la ciudá quier rindi-y a la so memoria y al so llegáu. Esti actu va sirvir amás como antesala de la próxima concesión oficial d’una cai col so nome, una iniciativa impulsada pola Sociedad Cultural Gijonesa col oxetivu de perpetuar el recuerdu de quien contribuyó de manera decisiva al arriquecimientu de la cultura asturiana y xixonesa.