Iris Díaz Trancho ye maestra y escritora
Nos años ochenta mio padre quixo sacá-y una semeya a un home que vendía artesanía nuna carretera de Los Llanos de Venezuela, a la vera l’Orinocu. Taba vestíu cola ropa propia de los Pumé, ún de los pocos pueblos indíxenes que queden yá nel país. Mio madre acababa de compra-y un par d’arcos, y la transación imaxen-recuerdu pa turistes paecía xusta, pero n’aquel tiempu nun yeren tantes les persones que carretaben con una reflex y al home prestó-y especialmente qu’aquel “reporteru”-y pidiere permisu pa retratalu.
– Yo siempre tuvi muncha gana de conocer España – díxo-y, nuna visión amable de les semeyes, na que, en cuenta robar almes, trespórtenles.
L’afición a la fotografía de mio padre heredámosla los fíos y, nunos años, vime yo tamién carretando cola reflex na maleta (ye un dicir, avidentemente siempre conmigo arriba) nel razonable periplu vital viaxeru de los venti años. Naquel momentu, muncho más democratizao lo de les cámares, yá nun facía falta ser un periodista gráficu de National Geographic p’aburrir a parentela y amitaes coles semeyes artístiques del últimu viaxe. Cola imaxen del ascena indiu cola mirada perdida, la muyer marroquina nel mercáu, los neños africanos colos pies descalzos. Y yá daquella (nun pasaron tantos años, contra, nun soi tan vieya), tenía claro que les semeyes a persones diben ser siempre con permisu, esplícitu hacia mí o implícitu nel artista que forma parte d’un espectáculu, un desfile o vende la so imaxen por unes poques perres. D’otra manera, semeyes a distancia o del cogote. Menos lucides pero más étiques coles persones que-y ponen color a la proyección fotográfica de mochiléu chachiguai que vas facer a la vuelta. Será que non solo heredamos el gustu polos oxetivos, tamién el sentimientu de pueblu indíxena que tarrez ver a so güela retratada mientres riega les plantes en batona, namás por llevar madreñes. Sí, pa eso tamién val la identidá. Y la empatía.
Pues si nos noventa y los dosmiles (¿dirase asina?) llegó la democracia a les cámares, na década de la imaxen na que vivimos l’afición a retratar, retratase y aburrir a parentela y amistaes en tiempu real, ye una realidá que llevamos nel bolsu y llamamos teléfonu móvil. Cásique tol mundu tien na mano, una parte muy importante del día, una gran antena que recueye, da dimensión y fai viaxar los conteníos gráficos que capta; pero tamién los que recibe al traviés d’un amigu o una tía que ta a dos mil persones de distancia de la mano que-y dio al “clic” per primer vez.
Essaouira (Marruecos), Iris Díaz Trancho
Yá superamos ampliamente los tiempos nos que buscábemos n’Internet el videu de la “Droja en el Colacao” pa morinos de la risa, yá non pol probe José Tojeiro y la so imprudencia p’abrir la puerta casa; sinón por ver la imitación d’esi amigu que lu clava. Los videos “virales” yá nun salen d’un reportaxe de la tele o una semeya na portada d’una revista de la que pues arrepentite. Los conteníos salen, dacuando de manera inocente, otres intencionada, de la semeya o grabación que compartimos nes redes sociales, nel grupu de WhatsApp. Como la d’aquella neña que falaba col pitu mientres que dibuxaba, un videu que vieron millones de persones y que salió del grupu familiar. La difusión de la vida que garramos col móvil marcha de les nuestres manes nel momentu del “clic”, porque yá nun tamos nuna proyección nel salón de casa, tamos nun gran escenariu na que la to imaxen pue ser escusa pa decir tolo que-y pete al que la recibe. Asina ye que la inocente madre de “la que has liao pollito”, tuvo qu’esplicar nuna entrevista pa la radio (esto sentilo yo, coles mios oreyines) que’l pitín en cuestión yera de casa, que taba bien cuidáu y qu’ellos teníen piteru y casería; retrucando asina a les amenaces de dalgunos chiflaos que se facíen llamar animalistes. Asina tamos.
Nun se vos, pero ye raru’l día que nun me sal un videu o una semeya robada na única rede social que me queda. Cotícense especialmente les de la xente mayor, pareyes de vieyinos de la mano, amigues tomando un vinu o baillando nun conciertu. Tamién les de los neños y neñes con perros o gatos, o pegándose un castañazu a lo “Vídeos de primera”. Cola única diferencia de que daquella yeren les families les que mandaben esi VHS que se proyectaba una única vez. L’orixe de la imaxen del menor y lo que puedan facer d’él les dos mil persones de la cadena nun paez danos muncho más. Y doi gracies cada día por tener una vida “naif” nel algoritmu, porque nun se si podría coles imáxenes robaes de la pareyina que ta achuchándose na playa, la moza a la que les matones del institutu acorralen nel bañu o’l meme del alumnu gay o de necesidaes de la clase que circula como la pólvora. Depués queremos mentes equilibraes na adolescencia.
Si fui quien a construir bien esti relatu que llevaba meses na mio cabeza, la conclusión cásique nun fai falta nin ponela. Toles persones somos reporteros con una reflex al llombu, pero non toos queremos viaxar a to casa, al to salón, o a ningún sitiu. Primero de da-y al “clic” a una persona desconocida pa depués morite de risa a lo Tojeiro, piensa un poco si queríes ver a to güela nesa situación. Más empatía o polo menos un poco d’educación. Pide’l puñeteru permisu.