Carlos Barrio ye Historiador
Lo primero son les víctimes, l’estrueldosu choque d’un barcu contra una ponte de Baltimore dexó un regueru de trabayadores finaos. Yeren mexicanos o salvadoreños que circulaben sobro l’edificiu cuando cayó embaxo. Munchos conocimos Baltimore gracies a David Simon, Ed Burns, George Pelecanos, Richard Price o Dennis Lehane. Ye l’universu The Wire, la maraviyosa serie onde s’entemecen policíes, políticos, traficantes o sindicalistes. La segunda temporada de la serie va dedicada casi de manera esclusiva a estos postreros, a la batalla pola supervivencia del trabayu nel muelle. Pa esto faen negocios puercos con xente bien peligroso, con griegos que nin siquier son helenos. El recién accidente de Baltimore devolvió a Frank Sobotka al primer planu. El sindicalista polacu col corazón partíu nel mundu del capital y el trabayu. Cuando se desatapó la corrupción del llexendariu sindicalista mineru José Ángel Fernández Villa munchos tamién s’alcordaron de Sobotka. El puertu de Baltimore yera una especie de cuenques mineres, con trabayadores sindicalizados y aficionaos al chigre. Homes duros énte un futuru inciertu. Pero había munches diferencies ente’l sindicalista polacu y el sindicalista asturianu. Villa tuvo abondu poder dende’l so ascensu lo más alto del SOMA, l’históricu sindicatu mineru fundáu en Vegaotos por Manuel Llaneza en 1910. Y nun yera pa menos, bona parte de la hestoria del movimientu obreru asturianu va veceyada al SOMA, a la UXT y al PSOE. El triunviratu socialista tuvo presente nes protestes qu’anubrieron el corazón mineru d’Asturies na primer metá del sieglu XX. Hai delles, pero pueden destacase dos: la fuelga de 1917, onde Llaneza se decató de que los militares tornaben la protesta d’agostu teníen la mesma simpatía polos obreros que polos rifeños que combatíen en Marruecos, y la Revolución de 1934, con Llaneza yá fináu, pero que dexó otros grandes nomes socialistes, como Ramón González Peña. Esa hestoria y eses figures son necesaries pa entender la importancia recién del SOMA. Manuel Llaneza mira pa la xente dende la principal arteria de Mieres, pero tamién dende la Casa del Pueblu. La so figura ye recordada cada xineru nel campusantu de La Belonga, onde se dan cita altos cargos políticos y sindicales. Llaneza ye un sinónimu d’honradez y resistencia al que se-y perdona, al traviés del olvidu intencional, les sos negociaciones con una dictadura, la de Miguel Primu de Rivera. El militar utilizó guante de seda con bona parte del socialismu español mientres aplicaba puñu de fierro con anarquistes o comunistes, pero yá se sabe qu’esto son coses d’un pasáu bien alloñáu. El PSOE, la UXT y el SOMA tuvieron de capa cayida mientres el réxime de Franco y fueron los comunistes los verdaderos opositores al sangrientu y corruptu dictador, pero la lleenda y el so pesu históricu tráenlos de vuelta nos años setenta. Tamién los intereses de la socialdemocracia europea y de dalgún qu’otru altu cargu franquista. Volvamos a Villa. En 1979 aportó a la secretaría xeneral del SOMA, cargu que ocupó hasta’l so abrupta cayida en 2014. Dende ellí lideró’l sindicalismu mineru socialista n’una de les etapes más difíciles de la minería, pero tamién la Federación Socialista Asturiana. Punxo alcaldes y presidentes; conceyales y directores de la extinta Caxa d’Aforros d’Asturies. Villa yera una especie de señor feudal, que decidía quién yera lliberáu al traviés del sindicatu nun trabayu tan duru como la minería al traviés de la denominada chequera. “El Tigre” taba al mandu de les protestes, negociaba con ministros y presidentes del Gobiernu y abría el cursu políticu del PSOE nacional na fiesta de Rodiezmo. Villa yera un referente moral, un sindicalista de barra, de chigre, de negociación y cago en Dios. Yera veneráu nel socialismu, pero tamién polos sos supuestos rivales. Gabino de Lorenzo defendiolu públicamente, pero tamién dende la esquierda a la izquierda del PSOE hubo voces que se referíen a él como un líder carismáticu que siguía les riegles de la socialdemocracia clásica y ponía al sindicatu percima del partíu. Siguiendo esta tesis, el PSOE asturianu sería una esceición n’Europa. Claro qu’hubo voces discordantes: Antón Saavedra dedicó media vida a denunciar les corruptelas del sindicalismu mineru, Gómez Fouz publicó en Clandestinos que Villa fuera chivatu de la tarrecible Políticu-Social. Pero nada raspiaba al dirixente socialista. Hasta que llegó la llamada Llei Montoro y demostróse que Villa robara muncho dineru. A partir d’esi momentu llegó la defenestración, pero tamién la esmemoria comenenciuda. L’amnesia fai que s’escaezan les negociaciones de Llaneza con Primu de Rivera; la enfermedá de Villa fai posible que nun sía xulgáu y esto fai alendar a muncha xente, que tamién aplica xuna amnesia colectiva: naide sabía nin abarruntaba nada a pesar de qu’a Villa -y debíen favores nes empreses, na política, nos sindicatos, na mina, na Universidá…Yera corrupción, pero tamién un mitu de la Asturies llexendaria y obrerista, los coyones y dinamita. De la homía pa cortar carreteres y pegase cola policía, d’axustar duru pal beneficiu d’una comunidá que conoció los sos pecaos y perdonar hasta qu’españaron públicamente. Asina de simple y murniu. Villa pasó a la hestoria y agora toca construyir otru mitu. El SOMA yá trabaya nello, que se tenga en cuenta.