Nacho Muñiz ye coordinador de los ciclos de cine de la Cultural
Desque Alejandro Díaz Castañu se fixo cargu de la dirección del FICX son yá dellos los proyectos que salieron adelantre frutu de la collaboración constante y activo entre’l Festival y la Sociedá Cultural Xixonesa, partiendo de la idea compartida poles dos instituciones de que la ciudá disponga d’una ufierta cinéfila que cubra tol añu, más allá de la intensa actividá que siempres nos trai payares. Como l’estrenu del cine español ya internacional nun suel tener cabida nes sales comerciales ta garantizáu polos ciclos que tienen llugar regularmente na Llaboral Cinemateca y nel CMI Pumarín Xixón Sur, el FICX y la Cultural punxeron en marcha’l Cine Club 60, un espaciu pal cine clásicu que va pola so tercer edición y que tuvo un reconfortante respaldu del públicu dende l’empiezu, col salón de la Escuela de Comerciu llenu en casi toles proyecciones. Foi precisamente l’ésitu que tuvo’l Cine Club 60 el qu’animó al FICX y la Cultural a dar un pasu alantre y programar un ciclu de clásicos del cine mudu.
Los años 20 del sieglu pasáu fueron, ensin dulda, los más decisivos y granibles del entós mozu mediu d’espresión; tres dos décades que podemos considerar d’ensayu ya investigación de los recursos espresivos qu’ufiertaba esti inventu tecnolóxicu pa crear un espectáculu qu’atraxera a les mases, apaez una xeneración de cineastes que tomen el relevu de los pioneros y que van crear, dende les sos aportaciones individuales, los cánones que van rexir lo que se va a convertir na forma d’ociu más popular, de primeres, y, darréu, nel arte por excelencia del sieglu XX. Esta esplosión creativa nun queda nel entós naciente imperiu hollywoodense, sinón que tien múltiples centros de referencia, ente los que destaquen especialmente la nueva Alemaña republicana, los países escandinavos, la acabante fundar URSS y, n’Asia, la puxante potencia industrial de Xapón. Les cuatro películes programaes quieren reflexar esta diversidá xeográfico y cultural que caracteriza la producción cinematográfica de la dómina, inda llueñe del dominiu aplastante que va exercer darréu -y exerz inda güei- Estaos Xuníos nos medios audiovisuales. Son munchos los creadores y les películes que nos gustaría que formaren parte del ciclu, pero los títulos escoyíos son auténtiques xoyes imprescindibles pa toa persona cinéfila. Siguiendo l’orde en que van ser proxectaes, empezamos con “Nací, pero…”, de Yasujiro Ozu; ye la película más “moderna” del ciclu, porque se rodó en 1932, cuando n’Occidente yá s’impunxera casi totalmente el cine sonoru, pero la so presencia ta más que xustificada, tendiendo que cuenta que pertenez a los empiezos de la carrera del maestru xaponés güei consideráu xeneralmente unu de los más grandes cineastes de siempre. Anque ye un títulu de “mocedá”, yá tán presentes toos les traces que definen el cine de Ozu; ello ye que casi trenta años dempués volverá rodar la mesma hestoria, esta vegada en color, col títulu de “Bonos díes”, una de les sos películes más conocíes internacionalmente. La segunda película programada ye “La pasión de Juana d’Arcu”, del danés Carl Theodor Dreyer; anque ye de producción francesa, podemos considerar representativa de la potencia del cine escandinavu, con nomes de la talla de los suecos Mauritz Stiller y Victor Sjöstrom (del que yá proxectamos “La carreta pantasma” nel Cine Club 60) o’l tamién danés Benjamin Christensen (del que vimos el so espeluznante “Häxan”). Amás, ye una d’eses películes llexendaries sobro les que s’escribieron un ensame de llibros y artículos, ente otres razones, nesti casu, pola impresionante actuación del so protagonista, Maria Falconetti. Ye imposible concebir una amuesa de cine mudu ensin qu’apaeza’l nome de F. W. Murnau, un cineasta que la so inflúi en otru ceadores ye cenciellamente decisiva; por poner un exemplu, John Ford declaró delles vegaes que decidió qué tipu de cine quería faer dempués de ver “Amanecer”, la primer película de Murnau en Hollywood. Cualquier película de Murnau ye digna de figurar nes antoloxíes, dende “Nosferatu” a “Tabú”, pero nesta ocasión decidimos por El postreru”,una auténtica exhibición d’espresividá visual cola que Murnau pretendía demostrar, y consiguir, que los intertítulos yeren innecesarios pa cuntar una hestoria. Terminamos con “La madre”, de Vsevolod Pudovkin; yera tamién necesariu incluyir una amuesa del cine soviéticu, que conoció, como l’alemán, xuna dómina dorada nos años 20 que nun se volvió a algamar dende entós. Les razones pa ello nun tán namá nel impulsu y la protección que-y dio a la producción de películes el primer gobiernu de la URSS, yá que consideraba al nuevu mediu’l más fayadizu pa sofitar la revolución, sinón nel surdimientu d’una bayura de cineastes con ánimu esperimentador y vanguardista que van llevar a cabu xuna ingente llabor teóricu y práctica sobro la espresión visual, con protagonismu especial pal montaxe, al que munchos d’ellos van considerar l’elementu clave de la creación cinematográfica. De xacíu, el nome de Sergei M. Eisenstein ye d’arrayadures conocíu, pero la llista de grandes creadores ye bien llarga: Dovzhenko, Dziga Vertov, Lev Kulechov, Leonid Trauberg… y, poques gracies, Pudovkin, l’escoyíu pa terminar esta pequena colección de películes mudes que, cien años dempués, creemos que siguen tan brillosos como cuando se rodaron.