Diego Díaz ye historiador y directivu de l’Asociación Cultural La Ciudadana d’Uviéu
Poques vegaes somos conscientes y valoramos na xusta midida la persistencia na sociedá asturiana, contra vientu y marea, d’una masa crítico de persones que sostien ese bon puñáu d’iniciatives culturales, sociales y ciudadanes que siguen alimentando na nuestra tierra espacios de conocencia, alderique y participación, tan necesarios como la Sociedá Cultural Xixonesa. A pesar del so avieyamientu, Asturies sigue calteniendo vivu esi filu centenariu de cultura ya ilustración popular, qu’arrinca colos Ateneos y les Cases del Pueblu del movimientu obreru anterior a la Guerra Civil, remanez nel inquietu y militante archipiélagu cultural del antifranquismo y la Transición, y apruz, anguaño, na bayura d’iniciatives que siguen dando distintes formes de batalla por una sociedá civil viva, activa y comprometida. Pola so actividá, pola so tradición, pol númberu de persones acomuñaes y pol so impactu nos grandes alderiques de la ciudá na que s’asitia, atreveríame a dicir que la Sociedá Cultural Xixonesa, sigue siendo mediu sieglu dempués de la so fundación, el buque insinia d’esa corriente histórica a la que me refiero. La Cultural fai política ensin ser un partíu políticu, y opina de lo que pasa en Xixón, de la qu’entama una conferencia sobro China, la presentación del últimu llibru d’Enric Xuliana, una proyección de John Ford o una cata de vinos.
Na variedá ta’l gustu, y na transversalidad la clave para trescender guetos y capiyes, y ganar el respetu d’amplios sectores sociales más allá de la mesma tribu. La Cultural llogrolo ensin arrenunciar nunca a ser un espaciu cultural arguyosamente allugáu na esquierda tresformadora, pero que sabe rellacionase ensin sectarismos col mundu que lu arrodia. Dende Uviéu y dende el restu d’Asturies tócanos deprender enforma de los nuestros amigos y compañeros de Xixón nel camín de faer de les nuestres asociaciones y entidaes proyectos tan serios y solventes como la Cultural Xixonesa. Superar el minifundismu, tomar en serio lo que tenemos nes manes y aumentar la escala (tamién económica) de les nueses estructures choca coles vieyes inercies, los mieos a lo desconocío y toes eses resistencies mentales que tenemos de dir valtando si realmente queremos influyir dende’l mundu de la cultura na marcha de la sociedá asturiana nun sentíu progresista y tresformador. Avanzo equí delles xeres qu’esi difusu movimientu cultural asturianu tien delantre énte la década nueva: más implantación territorial, meyor coordinación, diversificación d’actividaes y modernización de la nuesa imaxe y los nuesos conteníos p’asina tamién anovar y remocicar los nuesos públicos. Casi too ta por facer na construcción d’esi polu cultural alternativu a la hexemonía neolliberal, y faelo pue ser una aventura apasionante.