Pedro Roldán ye’l presidente de la Cultural
Va escasos díes, na nuestra ciudá, un de los gurus económicos d’Esperanza Aguirre llantonos un revival de los grandes ésitos del pensamientu neolliberal de décades pasaes: una recatafila d’auténticos dogmes de fe de la ilesia fundada por Hayek, Friedman y compañía, que siguen repitiéndose inasequibles al desaliendu, sin dexar que la evidencia del so fracasu históricu cuestione, nin de raspión, la so fe ciega na Mano invisible del Mercáu.
Si daqué demostró la esperiencia de la Pandemia ye l’absoluta necesidá de dotanos d’unos servicios públicos que garanticen el calter universal de derechos como l’atención sanitaria, redistribuyendo la riqueza y poniéndola al serviciu del interés xeneral, tal que s’establez nel articulo 128 del nuestru testu constitucional. Porque nesta Pandemia l’esfuerzu y la dedicación del personal sanitariu, docentes, fuerces d’orde públicu y, a última hora, de miles d’empleaos públicos foi clave pa superar un de los piores momentos de la nuestra hestoria, poniendo de manifiestu la necesidá d’afitar talos sectores amenorgaos por retayos sociales y polítiques d’austeridá basaes nel dogma neolliberal.
El mantra mil vegaes cacarexáu de que los servicios públicos xestiónense meyor dende’l sector priváu revelóse como otru exerciciu de “Fake News”, tan abondosos desgraciadamente nes redes sociales como nel alderique políticu. Asina por casu, l’informe del Tribunal de Cuentes del añu 2011 señala que la xestión directa de los servicios públicos, nel ámbitu municipal, ye más barata y eficiente que la xestión externalizada. Daqué lóxicu, per otru llau, si tenemos en cuenta que l’oxetivu d’una xestión privada de cualquier serviciu ye l’arriquecimientu, cosa que choca radicalmente col oxetivu principal de los servicios públicos: garantiza-y a la ciudadania l’esfrute de derechos y el caltenimientu de servicios esenciales.
La democracia contemporanea básase na triada Llibertá, Igualdá y Fraternidá, y plásmase nel Estáu Social. El dogma neolliberal entroniza la Llibertá, interpretada como mera llibertá económica, de la dexa la igualdá nun meru formalismu. Pero la concepción europea del estáu social, vieno a considerar que la igualdá énte la llei tien de conxugase con una igualdá material, afitada na Educación Pública, na Sanidá Universal y nel conxuntu de derechos sociales y económicos. Y la llibertá ensin esta igualdá real, da nun cascarón vacíu incompatible col desenvolvimientu d’una sociedá avanzada.
Afortunadamente, Xixón caltuvo una rede d’empreses públiques municipales, que fixo posible nestes décades que la ciudadania tuviere accesu a servicios de calidá con un costu netamente inferior al d’otres ciudaes qu’optaron pola externalización y la privatización.
La externalización y privatización de los servicios públicos tapa un tresvase bultable de dineru de los contribuyentes a los bolsos de les grandes corporaciones, dacuando en procesos opacos y corruptos; pero siempre dende la máxima: “privatizar los beneficios y socializar les perdes”.
Los autodenominados lliberales suelen dicir qu’onde meyor s’atopa’l dineru ye nel bolsu del ciudadanu; pero en realidá paez que e’enfoten más en meter el dineru del ciudadanu nos bolsos de les grandes corporaciones.