Maricuela, miliciana de la llibertá

Pedro Roldán ye Presidente de La Cultural

Cuando daquién llega a tan avanzada edá, ye un tópicu dicir que ye historia viva. Pero nel casu de Maricuela, que tien un nomatu que vien d’un personaxe de la obra de teatru ¡Arriba los probres del mundu!, la frase garra tol sentíu. Dizse de  Maricuela que ye la última miliciana socialista. La so militancia empecipió nel añu abegosu de 1936, animada pola terrible muerte del so hermanu en 1934, asesináu en Carbayín na represión de la Fuelga Revolucionaria de Ochobre. Xuntose daquella a les Mocedaes Socialistes Unificaes, participando na guerra contra los golpistes como miliciana y como enfermera de campaña. Prindáronla en 1937, sentenciándola a nueve años de cárcel, nun pudiendo salir en llibertá vixilada hasta 1941.

Casose nos años 40 con otru históricu del PSOE y miembru de UXT, Graciano Rozada Vallina, siguienda dambos dos cola so actividá y viéndose obligaos a esiliase. El compromisu de Maricuela siguió nel esiliu y nun aparó hasta güei. De vuelta a España y afincada en Xixón dende 2004, apaez davezu en medios y les sos intervenciones en redes sociales. Nuna dómina onde la ideoloxía neolliberal fundió’l sentíu de lo colectivo, llevándonos a una cultura que promueve l’individualismu estremu; nun tiempu onde fuerces reaccionaries tán inundando la esfera pública, faciendo por apropiase de los símbolos colectivos dende una perspectiva escluyente y poniendo en cuestión valores fundamentales de la sociedá democrática; nun tiempu onde tovía tamos dixiriendo los efectos d’una  erosión bultable del estáu social que nos dexó la crisis de 2008 y onde la política dió en sinónimu de descréitu, l’exemplu vivu de Maricuela da n’imprescindible. Y ye que Maricuela recuérdanos tolos díes que los derechos que esfrutamos anguaño son el resultáu de las lluches y conquistes de les xeneraciones d’atrás, pero son también un llogru pa la mayoría social que siempre tá en peligru de ser retayáu o degradáu cuando perdemos la capacidá d’organizanos. El so exemplu fainos recordar que la política nun ye un xuegu de grandes personaxes nin limitanos a votar cada cuatro años pa dexar los asuntos públicos nes manes de profesionales. Y ye que Maricuela fixo política, nel sentíu más noble de la espresión, nuna dómina na que militares golpistes sofitaos pol III Reich s’alzaron n’armes contra’l gobiernu d’España, emburriando al nuestru país nuna llarga nueche de cuatro décades y desatando una represión xenocida. Fixo política cuando militar nun partíu pa defender la igualdá ente homes y muyeres, la igualdá énte la llei o la subordinación de la riqueza al bien común implicaba enfrentase a la cárcel, al esiliu o a la muerte. Fixo política tola so llarga vida, porque ello significa exercer la ciudadanía: participar activamente na busca del bien común dende’l nuestru barriu, dende’l nuestru puestu trabayu, dende cualquier espaciu de la sociedá; defender los nuestros intereses entendiendo que nun son dalgo esclusivo del individuu aisllau, sinón un llazu que venceya a la mayoría de la sociedá contra una minoría favorecida que pon siempre pilancos pa nun perder los sos privilexos. El Premiu Juan Ángel Rubio honra la memoria de una figura que guarda bien de semeyadyres con Maricuela: el nuestru presidente foi otru militante comprometíu cola causa de la democracia y la xusticia social. Dambos taben enfotaos na defensa de los intereses de los más que tienen menos, frente a los menos que tienen más, y a ello consagraron la so vida. Güei, otra vuelta, los apóstoles del odiu quieren subvertir el sistema democráticu tratando, hasta col acosu, l’insulto y la coacción, de desllexitimar les opciones polítiques que fueron a facer una mayoría de gobiernu. L’exemplu vivu de Maricuela y l’alcordanza de xente como Juan Ángel Rubio son l’antídotu énte toos esos mensaxeros del miéu que quieren frayar la convivencia. Artículu publicado originalmente en La Nueva España.