David Guardado ye filólogu y especialista en Tecnoloxía de la Información

Na década de los años 30 del sieglu XX el fascismu italianu punxo en marcha un ambiciosu

proyectu de difusión del bimilenariu del emperador Augusto a traviés de delles esposiciones y el rellanzamientu d’escavaciones arqueolóxiques, y ún de los sos fitos foi la inauguración en Roma de la llamada Mostra Augustea della Romanità en setiembre de 1937 na que’l Duce s’amuesa como un trasuntu del propiu Augusto y la Roma imperial como modelu y antecedente de la Italia fascista que habría de siguir la so misión histórica.

Estes celebraciones y la esaltación d’Augusto y l’Imperiu tuvieron tamién un reflexu directu nuna España en guerra na que les tropes italianes y alemanes lluchaben sofitando a los sublevaos y na que la figura d’Augusto, les sos conquistes, la fin de la república romana y la implantación del modelu imperial convirtiéronse nun símbolu pal bandu franquista.

Augusto-fascismo

Reposición de la estatua d’Augusto en Tarragona en 1939

Si’l fascismu italianu vía en Roma un modelu nel que rescamplaba la misión imperial y la crítica a la democracia, el fascismu español, dientro de esi mismu marcu discursivu, amestaba amás la parte del relatu qu’enllazaba, adaptándolu a los intereses coyunturales, col pensamientu qu’ellaboraren parte de los intelectuales del 98, munchos d’ellos defensores y militantes del bandu llegal, que facíen igualmente partir de Roma l’aniciu de la unidá política y cultural española, y rescamplaben la “españolidá” de delles de les figures más nomaes de la romanidá (Séneca, Trajano, Teodosio…), ye decir, la supuesta influyencia sobro Roma y el so modelu d’unidá, civilización y paz, d’una España eterna y preesistente.

Anque’l discursu franquista sobro la romanización, como el del nacionalismu español que se fora iguando nos sieglos XVIII y XIX, tendía a poner en primer planu la unidá algamada por Roma non por ello dexaba d’esaltar igualmente l’honor y la resistencia frente a les tropes romanes de los “españoles” de Numancia y de caudiellos como Viriato, que se presentaben como un antecedente qu’amosaba las virtúes castrenses ya irreductibles de los habitantes del solar hispanu.

Sicasí, como señaló en dellos estudios l’historiador Antonio Duplá, nel discursu específicu de la Falange atópense unos planteamientos miméticos del fascismu italianu nesti aspectu, asina como la identificación dafechu de Roma, Italia, España, política imperial, fascismu y catolicismu, que se confronten tanto al salvaxismu de los pueblos “bárbaros” nel pasáu como al de los “bolcheviques” nel sieglu XX.

Augusto y el Frente del Norte

Les celebraciones augustees n’Italia coincidieron cola llucha nel Frente del Norte, lo que nun cayó embaxo. Ello, baxo’l mandu d’Augusto, y cuando se produz la fin de la República y el surdimientu del Imperiu, las tropes romanes peracabaron la conquista de toa Hispania tres del sometimientu d’astures y cántabros nuna guerra que según les fontes clásiques allongóse 10 años, del 29 al 19 a.c.

Precisamente en setiembre de 1937, coincidiendo tamién cola inauguración en Roma de la Mostra Augustea, les tropes baxo’l mandu del Consejo Soberano de Asturias y León, combatíen en Mazucu intentando tornar la entrada n’Asturies de les fuerces franquistes sofitaes por italianos y alemanes.

El 7 de setiembre, nel marcu d’esta ofensiva y en rellación coles actividaes del bimilenariu, el diariu Il Popolo d’Italia, que fundara’l propiu Mussolini, espublizó un artículu, La Spagna di Augusto, firmáu pol filólogo y periodista Goffredo Copolla nel que se comparaba la llucha nel norte d’España cola qu’Augusto entamara escontra astures y cántabros nesi mesmu territoriu: “Nel cordal cantábricu, nesos mesmos picos nos que güei llexonarios y españoles combaten xuntos escontra la furia bolchevique, Augusto tamién lluchó y ganó cuatro batalles”.

L’autor recordaba cómo la “paz duradera” d’Augusto “impunxera a los cántabros y a los astures una norma de vida verdaderamente digna y humana”.

La Spagna di Augusto - La España de Augusto

Il Popolo di Italia, 7 de setiembre de 1937

Celebraciones augustees n’España

El bimilenariu d’Augusto celebróse tamién en España na mesma guerra y posguerra, a traviés de dellos actos que contaron cola participación de les autoridaes italianes.

Asina, en 1938, echen a andar distintes iniciatives conmemoratives en Bilbao y Lugo, y en xunetu de 1939, unos díes primero d’acabar la guerra, restituyóse la copia de la estatua d’Augusto en Tarragona, una reproducción esacta del Augusto de Prima Porta en Roma que fora donada pol Ministru d’Exteriores de Mussolini en 1934 como parte de la propaganda del réxime fascista, y que fora retirada al entamar la guerra.

Nel actu de restauración de la estatua, Ramón Serrano Suñer en presencia del ministru d’Asuntos Exteriores d’Italia, Galeazzo Ciano, lleó un discursu nel que comentó que “na cautividá roxa, manes zafies y criminales valtaron la estatua del Emperador. El nuestru César victoriosu, Franco, llibertó esta ciudá d’aquella cautividá ominosa, coles armes d’España y con llexones de Roma”.

N’Asturies, el diariu Región espublizaba el 15 de xunetu un artículo ensin firma nel que s’afirmaba que “nun podíen los roxos y separatistes catalanes por menos que valtar la estatua d’Augusto qu’a la vieya ciudá española regalara’l Duce […] Pero la espada de Franco foi a volver a las tierres de Cataluña la claridá del destín español y con ella aquelles otres que nacieren en Roma”.

L’actu foi inmortalizáu pol Instituto Luce Cinecittá y pue consultase la grabación en Youtube:

 

Yá en 1940, tien llugar la llamada Semana Augustea en Zaragoza, ciudá que-y debe’l nome al emperador y na que tamién s’asitió nesi momentu una estatua idéntica de Augusto regalada, tamién, por Mussolini.

Los organizadores xustificaben nun poder celebrar los actos en 1937 pola mor de la guerra y l’alcalde de la ciudá, Juan José Rivas, nun discursu nel que condensa la retórica franquista sobre l’asuntu, recordaba qu’Augusto “permitió la romanización d’España, algamó la so unificación y fixo posible la hispanización posterior de Roma” polo que col actu honrábase “non sólo la nuestra acta de nacimientu como ciudá, sinon tamién el puntu de partida de toda una trayectoria histórica d’universalización del xeniu d’España, dispersu hasta entós en particularidaes localistes”.

Pela so parte el conde Zoppi, representante del gobiernu italiano, fixo entrega del regalu de “la estatua de bronce d’Augusto, que nun foi namás el fundador de la vuestra ciudá, sinon el fundador del Imperiu”.

También cuntamos con imáxenes d’esti actu que pueden consultase online:

 

Falamos d’un momentu nel que’l franquismu alcuéntrase axustando’l so discursu sobre la españolidá, y nel que l’arqueoloxía y el relatu sobro’l mundu antiguu y la romanidá conviértense n’elementos propagandísticos de primer orde p’afitar un discursu sobre España (unidá, paz, civilización…) que’l réximen tenta de facer hexemónicu. Nesi marcu, creóse en 1939 la Comisaría general de excavaciones arqueológicas qu’esi mesmu añu entamó la escavación de les termes del Campu Valdés en Xixón utilizando a “prisioneros” para facer el trabayu.

Un epílogu xixonés

La celebración del bimilenariu d’Augustu tuvo un reflexu serondu y, si se nos dexa, un poco chambón en Xixón qu’inda dura en forma d’estatua nel Campu Valdés, anque poca xente conoza’l so orixe.

Nel añu 1968 Ignacio Bertrand, un alcalde falanxista que cursara estudios na Italia de Mussolini nos años 30, propunxo celebrar un supuestu bimilenariu de Xixón faciéndolu concasar col bimilenariu del sometimientu de los astures; un aniversariu que, según el mesmu diariu de la Falange, Voluntad, yera “más o menos esactu, más o menos inventáu”. Lo que nun primer momentu diben ser una estatua d’Augusto, una escultura d’homenaxe a la Legio IV Macedónica y una reproducción de les Ares Sestianes, quedó nuna reproducción de la estatua d’Augusto en Tarragona que’l consistoriu alcordó encargar al entamar l’añu 1970.

Yá en 1971 nel mandatu del sucesor de Bertrand, Luis Cueto-Felgueroso, fíxose la inauguración de la estatua na que l’alcalde pronunció un discursu mui na llínia del so tiempu, argumentando que los romanos aportaren a la nuestra tierra “pa impregnanos de nuevos moos d’un espíritu civilizáu” fundando na nuestra Talaya la urbe xixonesa, lo que nos convertía nun pueblu “eminentemente romanu”.

Ahora sabemos qu’Augusto, a diferencia de Zaragoza -la Caesar Agusta romana- o Tarragona, la Tarraco onde Augusto moraba na campaña contra los astures, nunca punxo un pie en Xixón, que ya fora fundada y habitada sieglos primero de que les tropes romanes la conquistaren.

En realidá, tamién lo sabíen los contemporáneos del alcalde Bertrand y anque’l tiempu nun yera’l más afayadizu pa la crítica sí había un requexu pal humor. Asina, en xineru de 1969 un tal Virgilio na Hoja del Lunes de Gijón firmaba unos versos nos que decía “Yo me pregunto de qué calendario salió la fecha del bimilenario/ pues que yo sepa en ningún cronicón se fija el natalicio de Gijón”.

Bibliografía consultada

Balart Boïgues, Lluís. (2015), L’estàtua d’August de Tarragona. Kesse: butlletí del Cercle d’Estudis Històrics i Socials Guillem Oliver, 48, 48-57
Duplá Ansuategui, Antonio (2020), El franquismo y el mundo antiguo: una revisión historiográfica, Lecturas de la historia : nueve reflexiones sobre historia de la historiografía / coord. por Carlos Forcadell Álvarez, Ignacio Peiró Martín, 167-190
Duplá Ansuategui, Antonio (2012), La revista falangista Jerarqvia y el modelo imperial romano, Vasconia: Cuadernos de historia – geografía, 38, 813-837
Duplá Ansuategui, Antonio (2017), Augusto y el franquismo: ecos del bimilenario de Augusto en España, Revista de historiografía (RevHisto), 27, 137-161
Adán Álvarez, Gema Elvira (2001), El Servicio de Investigaciones Arqueológicas de Asturias (S.I.A.): F. Jordá Cerdá (1952-1964), en Trabalhos de Antropología e Etnología, 41(1-2): 207-224.

Prensa consultada y citada

Il Popolo di Italia, 7 de setiembre de 1937
Región, diario de la mañana, 15 de xunetu de 1939
Aragón, mayu-xunu de 1940
Voluntad del 25 de xunu de 1968.
Voluntad del 5 d’avientu de 1968.
Hoja del Lunes de Gijón, 27 de xinero de 1969
Voluntad, 7 d’agostu de 1971
Voluntad, Suplementu estraordinariu Begoña, 1971

Pin It on Pinterest

Share This
X