La Cultural quier amosar el so apoyu a la manifestación pola oficialidá del asturianu y el gallego-asturianu que convoca n’Uviéu la Xunta pola Defensa de la Llingua Asturiana’l 16 d’ochobre. El gobiernu asturianu abrió nestos díes un procesu de negociación con toles fuercies democrátiques de la Xunta Xeneral pa reformar l’Estatutu d’Autonomía d’Asturies. 40 años depués de la so redacción orixinal, esti estatutu nuevu ye una oportunidá histórica p’afondar nel nuestru autogobiernu y afitar un marcu nel que l’idioma asturianu xuegue el papel que-y correspuende, lloñe de la marxinación na que s’alcuenta anguaño y reconociendo, al tiempu, el derechu de la ciudadanía al so usu y conocencia.

Poro, dende la Cultural animamos a tolos asturianos y asturianes a participar nesta convocatoria que tien de ser la última na que se revindique un fechu que vien siendo normal nel restu del estáu: la oficialidá del idioma propiu xunto col castellanu. Asturies nun puede arrenunciar a la dignificación de la so llingua como parte fundamental del nuestru patrimoniu históricu y cultural.

Sábadu 16 d’ochobre – Estación del Norte d’Uviéu – 12:00 hores.
Manifestación pola OFICIALIDÁ

 

Pin It on Pinterest

Share This
X