La tercer edición del Cine Club 60 en collaboración col FICX y l’habitual programación de cine nel Centru Municipal del Llano va completar les actividaes de la Cultural Xixonesa nel primer mes de 2024
Esti 2024 la programación de la Sociedá Cultural Xixonesa vien cargada actividaes venceyaes a l’actualidá política, social y cultural d’España. Arrinca l’añu’l xueves 11 na Escuela Comercio, la profesora de Ciencies Polítiques de la Universidá Politécnica de Madrid ya Investigadora adscrita al institutu Complutense d’Estudios Internacionales (ICEI) y una de más mayores espertes en cuestiones europees d’España, Ruth Ferrero va averanos a dellos grandes retos que va encarar el proyectu européu nos próximos tiempos. El 19 de xineru, nel Salón d’Actos del Centru de Cultura Antiguu Institutu va tener llugar un de los alderiques más interesantes que sobre la cuestión territorial pueden celebrase nel momentu. L’expresidente de la Generalitat de Cataluña, José Montilla, la politóloga, columnista y diputada del Partíu Popular nel Congresu, Aurora Nacarino-Bravo y l’exportavoz d’ERC nel Parlamentu Joan Tardienta van aldericar sobre una de les cuestiones que más ta marcando l’axenda política actual, el futuru del modelu territorial. Cuestiones como’l financiamientu autonómicu o’l futuru de les relaciones con Cataluña van tratase nesti alderique del máximu nivel que va ser moderáu pol periodista xixonés Víctor Guillot.
El martes 30 de xineru nel Salón d’Actos de la Escuela de Comerciu va ser la vez pa la conferencia d’un de los analistes políticos más respetaos y reconocíos del estáu, el periodista catalán Enric Juliana. Sin dulda nenguna, ún de los meyores conocedores de los requexos de la vida política española que nos va falar de les grandes incógnites polítiques que s’albidren nesti 2024.
Pa rematar y non por ello menos importante, vamos tener la presentación de la tercer edición del Cine Club 60, una esperiencia que de la mano del FICX va averanos al meyor del cine clásicu mundial. Too ello acompañao cola habitual programación de cine nel Centru Municipal del Llano que nesta ocasión va tar dedicada a les películes escoyíes por pidimientu del públicu. Proxectárense les películes “GREASE”, “PARÍS TEXAS” de Wim Wenders y la version de “LOS MISERABLES” dirixida pol director francés Jean-Paul -y Chanois y protagonizada por Jean Gabin. Como ye habitual les películes van cuntar cola presentación de Nacho Muñiz, coordinador de ciclos de cine de la Sociedá Cultural Xixonesa.11:18