El premiu Juan Ángel Rubio, que concede tolos años la nuestra entidá, va dir esti  triste añu 2020 pal colectivu de trabayadores del Hospital de Cabueñes, en representación del conxuntu del personal sanitariu español.

Por cuenta la crisis sanitaria derivada de la pandemia, este añu nun foi a aconceyar el xuráu  pa fallar el premiu; sicasí, siguiendo lo previsto nos estatutos de la Sociedá Cultural Xixonesa, la decisión correspondiente tomose por alcuerdu unánime de la Xunta Directiva.

El Premiu Juan Ángel Rubio honra la memoria de quien fuera’l nuestru presidente. Una personalidá señera de la vida xixonesa: odontólogu de profesión, lluchador antifacista y oficial del exércitu de la II República, con una notable trayectoria nel activismu políticu y l’antifranquismu. Como directivu de la Cultural, apostó siempre por un modelu participativu de difusión de la cultura humanística y científica, como instrumentu para construir una ciudadanía crítica. Como profesional de la sanidá, venceyáu activamente a Cruz Roxa, foi un firme defensor de la xusticia social y del derechu a la salú.

Nestos tiempos nos que la Covid-19 precipitó al mundu a una crisis global, tanto sanitaria como social, inédita n’Occidente dende la II Guerra Mundial, sofrimos en carne propia lo feble de la sociedá de consumu y de la economía globalizada.

La Sanidá Pública y les persones que la faen posible xorrecen como finxu fundamental pa tornar un virus que ha valtó toles previsiones y camudó’l cursu la historia. La sanidá pública ye, en xunto cola educación y el sistema de pensiones, un de los pegollos fundamentales del estáu del bienestar. La salú ye un derechu básicu que tien de tar cubiertu y universalmente garantizáu nuna sociedá desarrollada; un derechu que nun puede seguir quedando supeditáu a la mercantilización o a la lóxica del beneficu priváu de grandes grupos empresariales, a los que se vieno abriendo les puertes de la xestión sanitaria pública con demenciales y antipatriótiques polítiques d’esternalización.

En toda España sufrimos retayos y precarización nel sistema de bienestar y mermes nos derechos ciudadanos; en bona midida inspiraos por directrices de la UE sobre estabilidá presupuestaria, fundamentaes en doctrinas económiques más que cuestionables, muncho más vinculaes a los intereses de los grandes poderes empresariales y financieros que a una aséptica viabilidá del sistema. Una de les consecuencies foi que la pandemia  golpeonos con un sistema sanitariu con menos recursos y personal qu’hai quince años. A ello súmase, especialmente n’Asturies, una población avieyada y especialmente vulnerable.

Los homes y muyeres que sostienen la sanidá pública son héroes y heroínas que llevan alantre la llucha contra un enemigu invisible, col arma de la ciencia pero engarriaos col pilancu de la precariedá, los retayos y auantando l’azote del amarillismu mediáticu, las conductes incíviques, la crispación política y la conspiranoia magufa.

Les trabayadores  del Hospital de Cabueñes son el rostru na nuestra ciudá d’esi gran pegollu de la democracia y los derechos humanos que ye’l sistema de sanidá públicu y universal.

Pin It on Pinterest

Share this
X