Comunicáu conxuntu de la Sociedá Cultural Xixonesa y de La Ciudadana Asociación Cultural en sofitu y solidariedá cola fuelga nos supermercaos d’Asturies.
Dende la Sociedá Cultural Xixonesa y <strong>La Ciudadana Asociación Cultural</strong> queremos espresar el nuestru sofitu total y solidaridá colos trabayadores de los supermercaos asturianos que tán secundando mayoritariamente la fuelga convocada nel so sector. Tán tratando d’axustar les condiciones del conveniu colectivu, énte una patronal del sector que nun paez entrar en razón énte reivindicaciones perfectamente lóxiques por que tolos empleaos ganen 14.000 euros a partir de 2021, xubíes salariales venceyaes a l’antigüedá, dos díes más de vacaciones y derechu a esfrutar de los festivos.
La fuelga ye un de los principales preseos de llucha de la clase trabayadora. Un derechu que historicamente sirvió y sigue sirviendo pa conquistar y ampliar los derechos llaborales.
Unes condiciones llaborales dignes pasen por unes retribuciones xustes pa poder cubrir afechiscamente les necesidaes vitales, pero tamién poder esfrutar del tiempu d’ociu pa texer llazos sociales y familiares. Nun ye una cuestión qu’afecte namás al sector llaboral implicáu. Meyores salarios y más tiempu d’ociu impliquen más capacidá de consumu y contribúin a la espansión d’otros sectores llaborales. Unes condiciones llaborales dignes dexen desenvolver proyectos de vida y garanticen una sociedá más cohesionada. Tola sociedá beneficiar de que el trabayadores y el trabayadores consigan meyores. Por too ello encamentamos a la sociedá asturiana a collaborar con esta fuelga nun mercando mientres estos díes nestos establecimientos. Esisten alternatives como’l pequenu comerciu a les que, con independencia d’esti conflictu llaboral, ye necesariu potenciar.
Ls consumidores somos tamién responsables, teniendo de premiar el respetu a los derechos llaborales y collaborando en causes sociales que van n’interés del conxuntu de la ciudadanía.
Xunta Directiva de la Sociedá Cultural Xixonesa y La Ciudadana Asociación Cultural.
22 d’Avientu de 2019.