Soraya Calvo González, profesora del Dptu. de Ciencies de la Educación y delegada d’Isquierda Sindical Asturiana (ISA) na Universidá d’Uviéu.

Eva Mª Fernández Fdez., personal d’alministración del Dptu. de Matemátiques y delegada d’Izquierda Sindical Asturiana (ISA) na Universidá d’Uviéu.

La selmana pasada’l diariu asturianu de mayor difusión publicaba’l sofitu de Principáu y Conceyu de Xixón a la creación del primer campus universitariu priváu d’Asturies, pal que la empresa propietaria de la Universidá Europea yá adquirió una parcela en La Pecuaria pal so desenvolvimientu. En principiu, y siempres según les noticies apaecíes na prensa, son dos empreses les qu’amosaron interés n’instalase na nuesa comunidá autónoma, la Universidá Europea y l’Universidá Nebrija, dambes con see central en Madrid. Col so establecimientu Asturies va dexar de ser esa isla d’educación pública superior ente tantos centros privaos que fueron apaeciendo a lo llargo y anchu del territoriu estatal nestes últimes décades, al calor de regulaciones favorables y munches vegaes, poques esixencies. Ye importante señalar que, na actualidá, nel Estáu Español, y según datos de la Secretaría Xeneral d’Universidaes, esistíen nel cursu 2023/2024 91 Universidaes qu’expedíen títulos oficiales nel territoriu nacional, de les cualos 50 yeren públiques y 41 privaes. Na actualidá’l númberu d’Universidaes Privaes dependientes d’empreses ya Ilesia ta n’aumentu siguíu por cuenta de la tramitación y aprobación de llicencies a nuevos centros en Galicia, Estremadura, Andalucía o Baleares, ente otres CCAA. Tamos falando d’un total de 14 nueves Universidaes qu’esperen empezar la so docencia nos próximos meses.

Pa Izquierda Sindical Asturiana (ISA), llueñe de ser xuna bona noticia, como manifiesten con gayola los gobiernos local y rexonal, ye un asuntu de grave esmolición. Consideramos que les declaraciones de les nueses responsables de política universitaria aplaudiendo estes inversiones son bien revesoses, entá ye más si tenemos en cuenta la impasividad y inacción na actualidá de los complementos autonómicos del PDI que llevamos esixendo les fuerces sindicales n’unidá nos últimos meses.

La nuestra Universidá pública tien munches coses de les que sentise arguyosa. Uniovi xenera’l 80% de la investigación realizada en Asturies, un productu empobináu a la meyora de la vida de toles persones con un valor públicu incalculable. Esto ye posible gracies al esfuerzu d’un personal con remuneraciones n’ocasiones precaries y con situaciones d’inestabilidá dilataes nel tiempu. La carrera académica ye un camín de fondu, con munchos años de salarios baxos y un futuru imprevisible pa persones con trabayos de valor social significativu y con una preparación previa d’altu nivel. Sueldos bien per debaxo de lo qu’ufierta’l mercáu; y contratos temporales ensin garantíes de estabilización. Nun suena abondo competitivo.

Y evidentemente, non too ye investigación: tamién tenemos bon profesoráu que fai posible que tengamos promociones con persones bien preparaes que munches vegaes tienen que salir d’Asturies pa demostrar lo que valen.

Somos una Universidá enserta nuna Comunidá en crisis estructural dende va décades, y a pesar d’ello les resultancies son positives y tienen fuerza. La ufierta d’Uniovi caltiense a un nivel más que decente con unos precios por matrícula de los más baxos, si non los más baxos, de tola xeografía española. Tou ello, con una población d’escasu millón d’habitantes y una proporción de moces que nun remonta dende los 80-90.

La nuestra institución tien enormes faltes a pesar del contratu de financiamientu tresañal, que se robló col Principáu y que vien dar un respiru mínimu. Nun hai más que ver la incapacidá d’atraer docentes en ciertes especialidaes, como informática o matemátiques -¿quién que nun tenga una enorme convencimientu va venir a la Universidá si nes empreses páguense meyores salarios ensin tener que pasar años de formación?-, el déficit d’infraestructures y los problemes en munches de les instalaciones, la falta de la formación riquida pal reciclaje del personal non docente, etc.

Nesi contestu lleguen les propuestes de les dos empreses educatives privaes, cola Universidá Europea como avanzadura en Xixón. Pero, ¿ye necesaria la presencia d’estes empreses? ¿qué complementariedá van apurrir si sacantes el d’Arquitectura tou los títulos que se van a impartir tán doblaos na nuestra Universidá? ¿qué van apurrir a la sociedá asturiana? Bonalmente creemos que más bien van restar el valor de lo público.

Ye llamadero que dambes van empezar ufiertando estudios de la caña sanitaria: Enfermería y Medicina. Paez que respuenden a una demanda social, anque nun sabemos cómo se va a facer frente a les necesidaes que riquen los estudios. Nel casu de Medicina, facultatives y equipos rectorales lleven tiempu alvirtiendo que nun se trata de que falten places nes nueses universidaes, yá que somos unu de los países desenvueltos con más facultaes de medicina per habitante. Ye más, l’Estáu acaba de financiar esti cursu l’aumentu de places en facultaes de delles universidaes públiques. Ye más bien un problema de falta d’atracción de ciertes especialidaes, como la medicina de familia.  Otru problema ye qu’estos estudios riquen centros hospitalarios pa realizar práctiques. Esi aspeutu ye unu de los más costosos porque esixe la dedicación del personal sanitario a la formación, que tien de compatibilizar cola actividá asistencial. Amás, dichos estudios precisen los mesmos espacios hospitalarios.

Ello plantega delles interrogantes, que piden reflexón y planificación. ¿Pueden los hospitales asturianos absorber y formar a toles persones matriculaes nes distintes facultaes de nuevu cuñu? ¿de qué númberu d’alumnáu tamos falando? ¿y quién va pagar? Porque si lo van a pagar les empreses, ¿cuántu piensen cobrar al alumnáu pola matrícula? Y con too y con ello, ye’l sistema sanitariu públicu’l que lo va a asumir. ¿Podemos tar falando otra vegada d’una privatización de beneficios y de la socialización de los costos? Paez qu’esta estratexa respuende a una dinámica de mercáu con intereses empobinaos a la privatización de la sanidá como enclín global. Hai yá décades que la educación y la sanidá convirtiéronse nun interesante nichu de negociu de too tipu d’empreses y fondos d’inversión. Y ese ye l’oxetivu, bien distintu del interés ciudadanu.

Entá más esmolecedor ye’l contestu mundial que va permeando adulces en ciertes comunidaes autónomes españoles, que ye afogar económica progresiva de les universidaes públiques. Si la infrafinanciación era la tónica habitual, agora lo que tamos viendo ye directamente la tresferencia lento pero constante de fondos públicos a les universidaes privaes. Al mediu plazu, si l’enclín sigue, va tener un efectu bien gafu nel nuesu desenvolvimientu como sociedá: la investigación de base realízase mayoritariamente en centros públicos porque nun tienen una torna económica inmediatu. La Universidá nun ye un centru d’expedir títulos, sinón un elementu fundamental dientro de la estratexa de desenvolvimientu ya investigación de los países. Esto ye especialmente peligrosu si entendemos que la investigación más rentable dende’l puntu de vista de mercáu ye aquella conectada directamente a les empreses, quedando la investigación básica y l’investigación n’humanidaes, artes, ya inclusive ciencies sociales nun segundu plano y supeditao a lóxiques mercantilistes.

Un aspeutu importante nel planu sindical ye la situación del personal a quien se va a contratar. Un personal que les sos condiciones de estabilización son cada vez más dures, tocantes a requisitos d’estancies nel estranxeru, publicaciones y hores de docencia, por un salariu que torga atopar docentes en delles especialidaes. Nun sabemos d’ónde se va sacar, qué salarios van percibir, qué condiciones llaborales van tener, o si se van a priorizar los contratos a tiempu parcial y/o de “collaboración”, práctica habitual nes Universidaes Privaes. Pel momento la única norma esplícita de referencia ye l’Estatutu de el Trabayadores. Desconocemos si va ser d’aplicación dalgún conveniu colectivu específicu, como’l VIII Conveniu colectivu nacional d’universidaes privaes. Ye más que probable que’l personal acabe teniendo una rotación alta, que nun ye lo meyor pa una institución educativa como la universitaria. Al personal técnico y alministrativu, nin lo mentamos. Si nes nuestres universidaes siempre se consideró como un elementu secundariu, magar la importancia esencial del so trabayu, nun somos facenos una idea de lo que pue ser nestos casos.

Dende ISA nun creemos que la competencia de les privaes vaya ameyorar el sistema, tolo contrario, van ser los mesmos recursos entá más partíos, lo que provoca a les clares l’aprobetayamientu de la población y de la calidá de los servicios. ¿O quiciabes daquién cree que les empreses vienen ufiertar inversiones por compromisu con Asturies? Col nuestru tamañu y pesu económicu tendríemos d’apostar entá más por una sola Universidá y pública, que sía pa tola ciudadanía y non yá pa quien pueda mercar un títulu, y que se convierta de verdá nuna ferramienta social de futuru.  Abrir la puerta a la irrupción de les Universidaes Privaes na nuestra tierra ye un ataque directu a la Universidá d’Uviéu y a tola comunidá educativa asturiana.

Pin It on Pinterest

Share this
X